• Экспертиза
  • От застройщика
  • Строительство
  • Аренда
  • Офтоп
  • Деньги
  • Интерьер, дизайн, ремонт
  • Архив новостей
    ПНВТСРЧТПТСБВС

Интерьер, дизайн, ремонт



У Беларусі набірае моцы маштабны праект “Створым разам! Колеравы трэнд Беларусi”, закліканы прыцягнуць увагу да важных пытанняў сучаснай архітэктуры і будаўніцтва. У прыватнасці – да праблемы выбару гарманічных колеравых спалучэнняў для інтэр’ернага і фасаднага афарбоўвання.
 
Ці гармануюць колеры, у якія пафарбаваны будынкі ў нашых гарадах, з адценнямі беларускага неба і нашым уяўленнем пра сябе? Чаму дамы сціплых і мірных беларусаў часам проста рвуць вока агрэсіўнымі і кіслотнымі танамі? Гэта – з нашай абыякавасці ці простай адсутнасці густу?.. Самы час пра гэта гаварыць і паспрабаваць агулам, вялікай талакой прывесці да суладдзя з прыродным асяродкам і нашай сутнасьцю знешні выгляд беларускіх гарадоў, лічаць удзельнікі маштабнага праекту “Створым разам! Колеравы трэнд Беларусi”.
 
Ініцыятарам і арганізатарам праекта выступіў салон дэкаратыўных матэрыялаў PREMIUM Decor. Ініцыятыву адразу падтрымалі Беларускі саюз дызайнераў, архітэктурнае супольніцтва, кампаніі “СтройМАСТЕРком” і А-100.
 
З’яднаць архітэктурнае супольніцтва вакол ідэі

У межах праекта “Створым разам! Колеравы трэнд Беларусi” запланаваныя шматлікія творчыя сустрэчы з архітэктарамі і дызайнерамі, семінары і майстар-класы па дэкаратыўных і аздабленчых матэрыялах, прэзентацыі праектаў і экскурсіі. Узяць удзел у мерапрыемствах могуць не толькі адмыслоўцы, але ўсе зацікаўленыя ў тым, каб наша жыццёвая прастора сталася больш утульнай і гарманічнай.
 
Дыялогавай і адукацыйнай пляцоўкай праекта выступае салон PREMIUM Decor. “Мы згуртоўваем адмыслоўцаў і хочам ствараць талакой, з’яднаць архітэктурнае супольніцтва вакол ідэі, вакол трэнда, каб у выніку выпрацаваць культуру ў гэтай сферы. Трэба ж з чагосьці пачынаць…” – кажа ініцыятар праекта Васіль Кордзікаў.
 
Пра актуальнасць і запатрабаванасць падобнага праекта ўжо выказаліся спецыялісты – дызайнеры, архітэктары, мастакі.
 
Так, дырэктар Мінскага інстытута добраўпарадкавання і гарадскога дызайну Святлана Барысовіч лічыць, што, напрыклад, у Мінску “не ўсё так безнадзейна” і “большасць будынкаў мае колеравыя пашпарты”: “Але ў той жа час з’яўляюцца і дамы кіслотных і парасячых колераў, ярка-зялёныя цокалі і г.д. Хаця мы па сваёй ментальнасці народ спакойны і стрыманы. Так што вельмі добра, што да гэтай праблемы прыцягваюць увагу. Хацелася б мець нейкую каларыстычную праграму ў маштабе краіны. Трэба прыкласціся да гэтай тэмы больш грунтоўна. І галоўнае – гаварыць пра гэта...”

Праект ужо выклікаў дастаткова гарачае абмеркаванне. Да яго далучаюцца новыя удзельнікі са свежымі ідэямі. Неўзабаве свае колеравыя спалучэнні прэзентуюць студыя “Чацьвёрты квартал”, Інстытут добраўпарадкавання і гарадскога дызайну. Са сваім бачаннем колеравых трэндаў Беларусі пазнаёмяць аўдыторыю праекта вядомы беларускі архітэктар Аляксандр Трусаў і дызайнер, паэт, культуролаг Міхал Анемпадыстаў.
 
Пачатак вельмі сур’ёзнай размовы

Міхал Анемпадыстаў лічыць, што праект “Створым разам! Колеравы трэнд Беларусi” – вельмі важнае пачынанне, бо трэба “ствараць сваю каларыстычную базу дадзеных, якая ёсць часткай культуры і супольнай прасторы беларусаў”. І гэтая прастора мае быць гарманічнай.
 
“Па вялікім рахунку пытанні аўтэнтычнасці прасторы і візуальнага выгляду – гэта дзяржаўныя пытанні. І вельмі дзіўна, што ў нас гэтым ніхто не займаецца. Гэта аддадзена ў кампетэнцыю мясцовых органаў улады. У выніку кожны гарадскі кіраўнік фактычна перайначвае горад на свой уласны густ. Адсюль – з’яўленне, напрыклад, у нашай гарадской прасторы залатых купалоў і зялёнай дахоўкі, якая невядомым чынам робіцца нечым агульнапрынятым. Але гэта – не беларуская традыцыя…” – кажа Міхал Анемпадыстаў.
 
“Вывучэнне каларыстыкі – важная справа. І зноў жа, паўсюль у свеце гэтым займаюцца дзяржустановы. Гэта павінна быць часткай нацыянальнай палітыкі, часткай культуры і гісторыі, і павінна ахоўвацца. І праект, які зладзіў салон PREMIUM Decor, – гэта, на маю думку, пачатак вельмі сур’ёзнай размовы. І дай бог, каб яе пачулі”, - дадае наш суразмоўца.
 
“Браслаўскі блакіт” і “Слуцкія паясы”

Гэта сур’ёзная размова ўжо пачалася. І ўжо ёсць вынікі – створана першая калекцыю традыцыйна беларускіх колеравых трэндаў. Да яе з’яўлення прычыніліся супрацоўнікі салона дэкаратыўных матэрыялаў PREMIUM Decor і выкладчык кафедры дызайна архітэктурнага факультэта БНТУ Дзяніс Дзегцяроў.

Калекцыя уяўляе сабой альбом колеравых спалучэнняў з натуральнымі выфарбоўкамі ды інспірацыямі. Яго цікава будзе гартаць нават неспецыялістам. Бо “прачытваецца” ён як паэма – пра колеры і адценні беларускага жыцця. Атрымалася змястоўна і лірычна.
 
Альбом быў створаны на аснове навуковай канцэпцыі, якую распрацаваў Дзяніс Дзегцяроў. Ён не першы год займаецца традыцыйнай беларускай каларыстыкай і плануе абараніць па гэтай тэме кандыдацкую дысертацыю.
 
Калекцыя раскрывае колеравы змест васьмі беларускіх вобразаў-сімвалаў – “Браслаўскі блакіт”, “Восеньскі скарб”, “Гаспадар”, “Каляды”, “Купалле”, “Куфар”, “Раніца”, “Слуцкія паясы”.



Кожны з васьмі блокаў суправаджаецца вершамі класікаў беларускай літаратуры – Багадановіча, Барадуліна, Геніюш, Гілевіча ды іншых.
Але пры ўсёй сваёй лірыцы калекцыя мае найперш практычнае значэнне. Галоўная мэта – каб прапанаваныя колеравыя ідэі выкарыстоўваліся ў аздабленні фасадаў і інтэр’ераў будынкаў і тым самым стваралі больш гарманічную і ўтульную прастору ў беларускіх гарадах.
 
Ад вытокаў і прыроды

Архітэктары, дызайнеры, рэстаўратары, мастакі могуць атрымаць альбом на запыт. Але азнаёміцца з ім і атрымаць кансультацыю ў салоне PREMIUM Decor могуць усе жадаючыя. Таксама – пакінуць свае заўвагі і каментарыі да праекта.
 
“У кожнага свой густ, мы не плануем навязваць моду і не прэтэндуем на канчатковую ісціну. Гэта наша бачанне. Але амерыканскія колеравыя трэнды 2015 года нам не падабаюцца. Ня той менталітэт, ня той лад, ня той клімат. І мы проста даем магчымасць чалавеку выбіраць”, - кажа дырэктар салона дэкаратыўных матэрыялаў PREMIUM Decor Павел Дарафейчык.

“Мы адштурховаемся ад вытокаў, ад прыроды, ад культуры. А потым ужо няхай гэтыя ідэі выкарыстоўваюць у сваіх работах нашы дызайнеры, архітэктары і г.д.”, - дадае дырэктар салона.
 
Прафесійны конкурс “PROdecor-2015”

Таксама вельмі важная падзея, якая адбываецца зараз у межах праекта “Створым разам! Колеравы трэнд Беларусi”, – прафесійны конкурс майстроў, якія працуюць з аздабленчымі матэрыяламі, “PROdecor-2015”. Конкурс мае на мэце падтрымаць таленавітых майстроў-аддзелачнікаў і прапанаваць іх працы для шырокага абмеркавання. Тым самым – падвысіць агульную культуру прымянення дэкаратыўных і аздабленчых матэрыялаў.

Арганізатары спадзяюцца, што ўнікальныя творчыя ідэі і новыя тэхнікі нанясення дэкаратыўных пакрыццяў будуць скарыстаныя ў праектах і ўпрыгожаць жылыя і грамадскія інтэр’еры.
 
Вялікія спадзяванні арганізатары праекта “Створым разам! Колеравы трэнд Беларусi” ўскладаюць на актыўны ўдзел у праекце студэнтаў – будучых архітэктараў і дызайнераў. Пляцоўка праекта можа стаць для іх добрай школай і практыкай. У салоне, спецыяльна для моладзі, ўжо ладзяцца семінары па новых тэхналогіях і матэрыялах у будаўніцтве. Ёсць магчымасць паслухаць сапраўдных мэтраў прафесіі.
 
Толькі разам можам змяніць сітуацыю

Праект “Створым разам! Колеравы трэнд Беларусi” разганяецца і набірае моцы. Канчатковым вынікам праекта мае быць супольны дакумент з распрацаванымі колеравымі трэндамі (у дадатак – брашуры, буклеты і рэкамендацыі). Усё гэта накіруюць у праектныя і будаўнічыя арганізацыі, дызайн-студыі і архітэктурныя майстэрні.
 
Толькі разам мы можам змяніць сітуацыю!” – запэўніваюць удзельнікі праекта “Створым разам! Колеравы трэнд Беларусi” і заклікаюць далучацца да талакі – дзеля таго, каб наш гарадскі асяродак стаўся гарманічным і ўтульным, а штодзённае жыццё – якасным і гарманічным.

www.premium-decor.by
 www.unid.by
 www.stroymasterkom.by
www.a-100development.by

ООО "СтройМАСТЕРком"
УНП 191166686
Нужные услуги в нужный момент
-10%
-25%
-40%
-20%
-50%
-15%
-15%
-50%
-37%
-18%
0059025